Luciano Spalletti është i lumtur për faktin se Luka Modric dëshiroi t’i bashkohej Interit, mirëpo duket se atë nuk do ta lë të lirë Real Madridi.
Burimet italiane janë duke insistuar duke thënë se Modrici po e kërkon transferimin në Inter, ndërsa atë spanjolle thonë se kroati do të nënshkruajë një kontratë të re me Realin.
“Nuk e di se çfarë do të ndodhë, por unë jam i lumtur që dikush si Modrici, i cili ka fituar Ligën e Kampionëve dhe ka qenë në finalen e Kupës së Botës, dëshiroi që të transferohej te ne”, tha Spalletti për Sky Sport Italia.
“Fakti që ai ka shprehur dëshirën për ta veshur fanellën e Interit më mbush me kënaqësi. Mendoj që është e vështirë të marrësh lojtarë si ai, dhe klubi ka bërë punën më të mirë për ta shprehur interesimin për të”.
“Nuk mendoj se ai do të vjen, sepse Real Madridi ka ende besim në një lojtar kaq të talentuar. Ne jemi skuadër e mirë përsëri, por nëse Modrici do të vinte, do të ishim edhe më të mirë”.
Mbetet të shihet deri në fund të merkatos nëse Modrici do të kalojë te Interi apo do të mbetet në Bernabaeu.